صباح الفل يا جدعان
بصوا انا شايف انه لازم نعرف الشباب
ازاي يبقي عضو رخم في اي منتدي يدخلة
والكلام مش علي منتدي بعينه
فلنبداء...........
بص ياعمي انت لسه مسجل في منتدي جديد
طيب تمام اوي كده خليك معايا وشوف...
اولا بالنسبة للنيك نيم اسمك يعني.. يكون جامد
وباعدين تظبط ملفك الشخصي
........................
الاسم / زي ما قولنا يكون جامد..ومتنساش تكتب ميلك
الصوره الرمزيه / تكون جامده فحت...
التوقيع / يكون عليها صوره لولد امور كده
واسمك بالبونط العريض واسم السايت
صغنون او مش مهم خالص
..............................
هيبقي عندك حاجتين تلعب عليهم اللي هما ايه يا سيدي
1 / الاعضاء 2 / اقسام المنتدي
_______________
اولا الاعضاء
1 / بص يا سيدي المنتدي عاملك رسايل خاصه
انت هتظبطلك كلمتين حلوين وتعملهم كوبي
وتخبطهم في اي رساله لكل البنات
2 / اي توبك لاي بنت تدخل وترد وهايل ومش عارف ايه
وباعد كده ادخل وابعتلها الرساله اللي انت عاملها علي تكست
3 / الشباب بقي ادخل عقب علي اي توبك لاي حد حتي لو جامد
شركله الموضوع ويا سلام لو تصميم قول مسروق واعمل قلق
_______________________________________
4 / المشرفين والاداراه ماتحكيش معاهم خالص علشان العضوية
_______________________________________
5 / طبعا هتبقي لسه جديد علي المنتدي..هتلاقي عضو معروف في المنتدي
واسمه في المنتدي فلان ولكن في الحقيقه احمد ادخل وقول هايل يا ابو حميد
تسلم ايدك يا صاحبي مع انه ميعرفكش اصلا بس غلاسة
6 / البنات بقي رد عليهم باسم دلع يعني اسمها مروه قولها يا مرموره
وكانكوا تعرفوا بعض كويس اوي مش انت غلس بقي
................ندخل بقي في المفيد ..............
اقسام المنتدي....
==== قسم النقاش الحر او اتكلم براحتك ======
متتعبش نفسك وتعمل موضوع ادخل علي اخر صفحة في القسم
هتلاقي موضوع محدش رد عليه ومنسي اعملة كوبي وباست ياريس
وتخبطه وتسمي باسم تاني ولو عندك وقت غير فيه شويه
--------------------------------------------------------
هتلاقي توبك جامد وكل الناس بترد عليه دور علي اي غلطه مطبعيه فية
وادخل عقب عليها وفكك من اي حوار تاني
---------------------------------------------------------
اعملك كل يوم عشرين موضوع بنفس الطريقة اللي قولنا عليها في الاول
وبكده هتتعب المشرف اوي لانه مفروض ليك عدد معين واكيد مش عشرين
----------------------------------------------------------
كمان لو نزلت موضوع ملحق بيه صور لازم تسيب لينكات الصور عليها
واعمل انك عبيط ومش عارف اي حاجه خالص علشان الساسبند يا ريس
------------------------------------------------------------
ركز اوي في مواضيع تمدح فيها البنات وتذم فيها الشباب
اتظاهر بالرومانسيه مع انك رخم
======= قسم الصور ===========
بص يا سيدي اشتغل علي الصور الموجوده في المنتدي اصلا
-----------------------------------------------------------------
لو المنتدي بيتكلم عن فنان معين اخلفها انت ونزل صور
لفنان تاني خالص في نفس المجال
---------------------------------------------------------------
هتلاقي صور نزلت لسه طازه اخبطها انت واكتب عليها اسمك واعمل عبيط
----------------------------------------------------------------
لما تنزل صوره يكون عليها اسمك ومش مهم اسم المنتدي
======= قسم التصميمات ============
متتعبش نفسك وتعمل تصميم شوف تصميم قديم في المنتدي
وخدوا وغير فيه حاجات بسيطة والزق اسمك علية
-----------------------------------------------------
لو لقيت عضو جديد عامل تصميم ادخل اسرقة وظبطه وقول بتاعك
واعمل ثره ومشكله كبيره في المنتدي
-----------------------------------------------------
ادخل علي منتديات لنفس الفنان واسرقلك كام تصميم وظبطهم
ويا سلام لو اللي عامل التصميم موجود في المنتديين
ومالحقش ينزلوا في المنتدي اللي انت فيه تبقي ضربة معلم
-------------------------------------------------
اعمل تصميم مبيحكيش عن اي حاجه يعني رسمه شجر او بيوت كده يعني
-------------------------------------------------
====== قسم التاليف ========
ادخل علي اي منتدي عام مش معروف اوي ويا سلام لو كان جديد
واسرقلك شويه كلمات جامده وشغل الكوبي باست
----------------------------------------------
في المنتدي اللي انت فيه ادخل بردوا علي الصفحة الاخيره فيه
واضربلك كام موضوع مفيش عليهم ردود كتير وياريت ميكونش
مشرف القسم رد فيهم علشان ميقولكش مكرر هنا
-------------------------------------------------
اي ولد بيكتب حلو ادخل عدل علي كلماته وقول ناقصه والسجع والقافيه وكده
انما اي بنوته لو حتي مبتعرفش تكتب خالص قول حلو ويسلموا ومنتظرين جديدك
------------------------------------------------
======= قسم الاخبار لو موجود في المنتدي ======
اديها اشاعات ياريس وافشر بس باسلوب حلو علشان التوبك ميتحذفش
-----------------------------------------------------------------
اعملك كل يوم 5 مواضيع وكلها زي ما قولنا اشاعات
---------------------------------------------------------------
هتلاقي واحد لسه منزل خبر صحيح وزي الفل ...طيب تعمل ايه ...اقولك
ادخل والخبر لسه طازه اعملة كوبي وغير فيه شويه وغير طبعا عنوان الموضوع
ويا سلام لو ضربت مع الخبر صوره جامده
------------------------------------------------------------------
شوف الاخبار القديمه ورد عليها علشان تظهر فوق في المشاركات الجديد
وبكده المشرف هيتخنق ومش هيعرف يعملك حاجه طبعا
-------------------------------------------------------------------
اشتغل علي الاخبار المسروقه من المنتديات الاخري علشان تبقي ماشي في السليم
--------------------------------------------------------------------
======== القسم الخاص بالبنات ==========
طبعا هتدخل ترخم وتشوف اخر الازياء وتنقد وتقول ده حلو وده موديل قديم وكده
------------------------------------------------------------------
بردوا علشان ميزعلوش منك شوف ليهم اي موضوع ومش هتتعب المنتديات كلها
فيها القسم ده ما هي البنات واخده حقها اوي
------------------------------------------------------------------
ادخل في القسم ده واعمل مشاركات كتير رخامه يعني ومحدش هيقولك حاجه
ما انت ماشي في السليم ....ولازم تبقي نشيط اوي في القسم ده
------------------------------------------------------------------
======== قسم الشكاوي والاقتراحات ========
ده بقي لازم تركز فيه هو كمان وكل يوم تعمل فيه علي الاقل موضوعين
----------------------------------------------------------------
اشتكي دايما من اي عضو جامد في المنتدي انه بيسبك في الرسايل الخاصة
واعمل قلق في المنتدي وشوفلك واحد رخم زيك يساندك علشان الشكل العام
-----------------------------------------------------------------
اقترح عمل قسم الشباب علشان المساواه مع البنات طبعا
-----------------------------------------------------------------
اقترح عمل اقسام كتير ميكونش ليها اي اهمية خالص
-----------------------------------------------------------------
اقترح اقتراحات غريبة ومستفزه بس طبعا بادب علشان العضوية بتاعتك
-----------------------------------------------------------------
لو مفيش شات في المنتدي كل يوم تعمل توبك تسال فيه فين الشات
-----------------------------------------------------------------
اطلب فتح قسم المشرفين ومشاركه الاعضاء ليهم في القسم
وده بقي قمه الرخامة يا ريس
^^^^^^^^^^^^^^^^^^^^^^^^^^^^^^^^^^^^^^^^^^
واساسي متنساش تقلب الاقسام ازاي بقي دي ياريس ...اقولك
رد علي المواضيع ابتداء باخر صفحة وكل يوم شويه متقلش
علي نفسك يعني وتتعب خلي المشرف يتعب شويه
^^^^^^^^^^^^^^^^^^^^^^^^^^^^^^^^^^^^^^^^
ومتنساش تطلب من الادمن يغيرلك الرتبة يعني قولها خليها عضو زي العسل مثلا
وانت طبعا عارف انك ارخم انسان في الدنيا
^^^^^^^^^^^^^^^^^^^^^^^^^^^^^^^^^^
^^^^^^^^^^^^^^^^^^^^^^^
وان شاء الله هتاخد ساسبيند مبمبر مدي الحياه
وابقي اعمل عضويه تانيه وظبط ياريس
===============================
علي فكره انا مبعملش كده خالص يا شباب
=====================
ويلا اقلبوا الدنيا بقي
الرئيسية 
موضوع: عايز تعرف ازاى تبقى عضو رخم ؟ طب تعال هنا وانا اعلمك 
الإثنين مايو 28, 2007 8:52 pm